«Халык инспекторы»нда татарстанлылар 5,6 млн сум акча эшләгән: иң зур сумма - 275 мең

Бу вакыт эчендә татарстанлылар түләүле 7 категория буенча 12 меңнән артык гариза тапшырган һәм 5,6 млн сум акча эшләгән.

Рекордсмен 226 гариза җибәргән һәм 275 мең сум алган республика кешесе булды, икенче урында – 209 гариза буенча 260,8 мең сум эшләгән кулланучы.
«Халык инспекторы» системасында татарстанлылар Дәүләт автоинспекциясе ярдәмчеләренә әверелә һәм административ хокук бозуларны вакытында ачыкларга ярдәм итә.

Татарстан Республикасы Цифрлы үсеш министры Илья Начвин хәбәр иткәнчә, «Халык инспекторы» кушымтасы хокук бозулар турында хәбәр итү ысулы гына түгел, ә Татарстан юлларында куркынычсызлыкны арттыруның реаль коралы булып тора. Ул ассызыклаганча, һәркем дөрес булмаган парковканы яки куркыныч машина йөртүне сизә һәм теркәп бара икән, барысы бергә бер-берсен аварияләрдән, җәрәхәтләрдән саклый һәм гомерләрен коткара. Аның сүзләренчә, кушымтада яше 17 дән 67 яшькә кадәр булган 199 меңнән артык уникаль кулланучы теркәлгән.

Кушымтада штраф суммасының 25 процентын алырга мөмкин, ә система автомат рәвештә заявканы эшкәртүне тизләтү өчен урынны билгеләячәк.

Искәрмә:
Татарстанда «Халык инспекторы» Дәүләт Мәгълүмат Системасы Юл хәрәкәте кагыйдәләрен бозуларны һәм төзекләндерүне видеога теркәү өчен 2014 елда эшли башлаган иде. 2024 елның сентябрендә кушымтаның яңартылган версиясе чыкты, ул җиде категория буенча хокук бозу турында хәбәр өчен түләү алырга мөмкинлек бирә:

• кызыл утка бару;
• каршы як полосада хәрәкәт;
• светофорның тыю сигналы булганда тукталыш сызыгыннан чыгу;
•  хәрәкәт иткәндә телефоннан файдалану;
• тагылмаган куркынычсызлык каешы;
• җәяүлене үткәрмәде;
• транспорт чарасыннан калдыкларны ташлау

ТР Цифрлы үсеш министрлыгы матбугат хезмәте