Җырчы Айсылу Габдинова: «Ирем – минем беренче мәхәббәтем»

Күпләр аның кабат кияүгә чыкканын дасизми калган. “Интертат” хәбәрчесе Айсылу Габдинова белән сөйләшкән.

– Айсылу, әни булуың белән. Эйфория әле дә бармы?
– Рәхмәт! Әйе. Иң зур бәхет – балам.

– Кияүгә чыгуыңны, йөклелек чорыңны күрсәтмәдең. Гадәттә, артистлар бар этапларын күрсәтеп бара. Ни өчен?
– Чөнки бәхет тынычлыкны ярата. Күз тиюгә ышанам. Интернетта сиңа бөтен кеше дә бәхет теләп утырмый. Үзем өчен курыкмыйм. Якыннарымны саклыйсым килә.

– Улыгызга исемне язылучыларың белән сайладың кебек. Әллә ул исемне алдан уйлап куйган идегезме? Авырлыгы, буе? Кемгә охшаган?
– Исемне баланың малай булуын белү белән әтисе сайлады һәм мин ризалаштым. Язылучыларыма дөрес җавапны сайларга тәкъдим иткән идем. Улыбыз Арыслан 4 килограмм авырлык белән туды. Хәзер дә тиз үсә. Ашарга ярата. Тьфу-тьфу.
Бала тудыру йортында ятканда шундый әйбәт кызлар белән бер палатада туры килдек. Берсенең улы Лев иде, ә безнең исем Арыслан булды.

– Ирең белән кайда таныштыгыз? Кайсы өлкәдә эшли?
– Бу, гомумән, бик кызыклы тарих. Ирем – минем беренче мәхәббәтем. Кайчандыр без аның белән бер музыка мәктәбендә укыган идек. 14 ел үткәч, очраклы рәвештә күрештек тә, бергә булырга булдык, сузмадык. Русча әйтмешли, «первая любовь не ржавеет». Ирем музыкага, сәхнәгә бәйле кеше түгел.

– Ялгышмасам, Казанның 1нче бала тудыру йортында тапкансың, һәм сиңа коридорда ятарга туры килгән.

— Әйе, Арысланны Казанның 1нче бала тудыру йортында таптым. Килешү төзеп таптым. Табибны үзем сайладым. Калган барлык шартлар шул ук. Килешү үзе 31 мең сум тора. Табибым бик ошады. Анысы – иң мөһиме. Бөтен җирдәге кебек, бик яхшы һәм бик үк яхшы булмаган хезмәткәрләр бар. Мин яткан вакытта табучылар бик күп иде. Бер тәүлек коридорда яттым. Шунысы әйбәт булды: палатага караганда анда җиләсрәк һәм һава бар иде. Ашау «так себе». Мин көн дә гаиләм алып килгәнне ашадым. Аерым ята торган һәм «Ана һәм бала» палаталары бар.

– Йөклелек чорында җыелган авырлык кими барамы? Әллә, киресенчә, арттымы?
– Йөклелек чорымда мин бары 7 килограммны өстәдем. Бала тудыру йортыннан чыкканда, балага узганчыга кадәрге авырлыгымнан 3 килограммга әзрәк булып чыктым.
Балага узганчыга кадәрге вакытымны алсам, хәзерге Айсылу миңа күпкә ошый. Күрәмсең, улым яшь, матур әни теләгән.

Эльза Газизова.

Чыганак: Шәһри Казан