Гөмбә белән сыр пирогы рецепты

«Челнинские известия» балалар бакчасында эшләүче Алия Липантьевадан гөмбә, сыр, яшел суганнан пирог пешерү рецептын тәкъдим итә.

Камыр өчен: 25-30 мл су, 1,5 стакан он, 1 йомырка, 80 грамм атланмай, тәменчә тоз.

Савытта су, йомырка һәм тозны бергә болгатырга, атланмай өстәргә, чәнечке белән массаны изәргә, аннары кул белән дәвам итәргә. Онны акрынлап кушып йомшак камыр әзерләргә. Камырны 15-20 минут «ял иттерергә».

Эчлек өчен: 500 грамм шампиньон гөмбәсе, 200-300 грамм каты сыр, яшел суган, 1 суган, 30 грамм үсемлек мае, тоз, борыч, 1 бал кашыгы киптерелгән яки яшел укроп.

Сырны эре угычтан уарга, вак итеп туралган яшел суган белән бергә болгатырга.

Гөмбәне яхшылап юарга, дуршлагка салып суын саркытырга, эрерәк итеп турарга.

Кызган табага май салырга, вак итеп туралган суганны үтә күренмәле булганчы кыздырырга, гөмбәне өстәргә һәм әзер булганчы кыздырырга, тәмләткечләр өстәргә.

Эчлекнең суынганын көтәргә кирәк.

Камырны җәяргә һәм табага куярга «бортик» ясарга. Суган белән гөмбгә сыр һәм яшел суган массасын салырга. Аннары эчлекне табага җәяргә.

180 градуска кадәр кызган духовкада 35-40 минут пешерергә. Пирог әзер булгач өстенә укроп сибәргә.

Пирогны җылы килеш табынга бирергә була.

Чыганак (+фото): ИНТЕРТАТ