Арча яшьләре активлыклары һәм талантлары белән сокландырды

Җәйнең матур көнендә шәһәр бакчасына җыелган яшьләр өчен бай эчтәлекле күңел ачу программасы әзерләнде. Чараны Үзәк китапханә хезмәткәрләре оештырды.

Иң элек катнашучылар музыкаль батлда көч сынашты. Алар заманча хитларны таныды, җыр сүзләрен дәвам итте, үзләренең музыка өлкәсендәге белемнәрен күрсәтте. Яшьләр яраткан җырларын бергәләп башкарды, бәйрәмгә күтәренке рух өстәде.

Аннан соң интеллектуаль биремнәр башланды. Егетләр һәм кызлар яшьләр сленгы буенча белемнәрен сынады, «яшьлек» сүзенә бәйле ассоциацияләр тәкъдим итте. Иң кызыклы мизгелләрнең берсе «перспектива» сүзендәге хәрефләрдән яңа сүзләр төзү бәйгесе булды. Бу бирем һәркемгә үзенең киләчәге турында уйланырга һәм иҗади фикерләү сәләтен күрсәтергә мөмкинлек бирде.

Кичәнең йомгаклау өлешендә барысы да флешмобка кушылды. Дәртле көйләр астында башкарылган уртак бию яшьләрнең бердәмлеген, энергиясен һәм күтәренке кәефен чагылдырды.

Оештыручылар фикеренчә, мондый очрашулар яшьләрне аралаштыра, иҗади мөмкинлекләрен ачарга ярдәм итә һәм Арча районы яшьләренең талантлы, инициативалы булуын тагын бер кат раслый.

Фотолар: район Үзәк китапханәсе