Арча сәяхәтчеләр өчен менә дигән төбәк!

– Илназ Ирекович, бүген туризм һәм кунакчыллык индустриясе интенсив үсеш ала бара. Ә Арча районы нәкъ менә туризм өчен бик кулай төбәк.  
– Әйе. Арчадан күпме акыл ияләре, мәгърифәтчеләр, алдынгы карашлы дин әһелләре, язучылар, шагыйрьләр, сәнгать ияләре чыккан! Күренекле мәгърифәтчеләр Габделнасыйр Курсави, Шәмсетдин Күлтәси, Шиһабетдин Мәрҗани, Галиәсгар Камал, Габдулла Тукай, Гомәр Бәширов, Гариф Ахунов, Мөхәммәт Мәһдиев һ.б. шәхесләр туып-үскән. Арча ягы – республикабызның олы тарихлы, мәшһүр кешеләре белән дан тоткан иң зур районнарның берсе. Табигате дә бик гүзәл. Сөйләр сүз күп, күрсәтер, таныштырыр өчен тарихи, кызыклы мәгьлүматлар бихисап. Арча – туризм өчен менә дигән район!
– Безгә дә, газета укучыларыбызга да кызыклы булыр: бүген Арча районында туризм өлкәсендәге эш юнәлешләре турында сөйләсәгез иде. 
– Туризм – ул сәяхәт, ял итү генә түгел, шулай ук икътисадның мөһим үсеш тармагы да. Туризм – икътисадның алдынгы һәм иң тиз үсеш алган тармакларының берсе. Соңгы елларда туризм инфраструктурасын үстерүгә зур игътибар бирелә. Яңа кунакханәләр, кафелар ачыла, юллар төзекләндерелә. Арча үзенең кунакчыллыгы белән дан тота. Без һәркемне ачык йөз белән каршы  алырга әзербез! Арча районы туристларны кабул итәргә әзер. 
– Искә төшерик әле, Арча районында нинди музейлар бар? 
– Белгәнебезчә, Арча районы музейларга бай. Арча тарих-этнография музеенда районның тарихы, мәдәнияте, көнкүреше белән танышырга була. Яңа Кырлай авылында урнашкан Г.Тукай музей-комплексы гына да ни тора! Анда шагыйрьнең балачагына бәйле йорт та бар. Гөберчәк авылында Мөхәммәт Мәһдиев, Сикертәндә Галиәсгар Камал, Арча педагогия көллиятендә  бердәнбер “Әлифба” музее эшли. Һәр музей үзенчәлекле һәм экспонатларга бай. 
– Районда табигать яратучылар өчен мөмкинлекләр күп. Бу юнәлештә нинди сәяхәтләр оештырылачак?
– Арча районының табигате бик матур. Район урманнар, елгалар, күлләргә бай. Туристлар өчен җәяүле сәяхәтләр, велосипедта йөрү, балык тоту, гөмбә җыю кебек чараларны оештыру күздә тотыла.    
 – “Тукай юлы” проекты туристлар өчен нәрсәләр тәкъдим итә?
 – Габдулла Тукай юлы – шагыйрьнең тормышы һәм иҗаты белән бәйле урыннар буенча туристик маршрут-сәяхәт ул. Әлеге проект Арча районының Яңа Кырлай, Өчиле, Кушлавыч һ.б. авылларны үз эченә ала. Туристлар Тукай музеенда булачак шагыйрь яшәгән йортта, мәктәптә булачак. Шулай ук, маршрут кысаларында татар халкының милли уеннары, гореф-гадәтләре белән танышу мөмкинлеге дә бар.
 – Арча районында Тукай юлы буйлап велосипедта сәяхәтләр уздырылганын белеп торабыз.  
– Әйе, Арча районында велосәяхәтләр, велоузышлар даими рәвештә уздырыла. Бу спорт төрен яшьләр генә түгел, өлкәннәр дә ярата. Велосипедта сәяхәтләр туристларны җәлеп итә, чөнки алар районның матур табигатен күрергә, сәламәт яшәү рәвеше алып барырга, тарихи урыннар белән танышырга  мөмкинлек бирә. Әле күптән түгел генә “Шагыйрь юлы – Тукай юлы”,  “Тукай юлы“ маршруты буенча велофестиваль-сәяхәтләр узды, аны  район яшьләр эшләре, спорт һәм туризм бүлеге оештырды.  
 – Районда уздырылган милли бәйрәмнәр белән туристлар  кызыксынамы, алар мондый күңел ачуларга чакырыламы?
– Бездә милли бәйрәмнәр бик зурлап уздырыла. Сабантуй, Нәүрүз, Ат көне, Арча читекләре кебек бәйрәмнәр татар халкының гореф-гадәтләре, уеннары, җырлары белән үткәрелә. Әлбәттә, без барлык туристларны да әлеге бәйрәмнәрдә катнашырга чакырабыз. Чөнки бу – татар мәдәнияте белән якыннан танышу өчен менә дигән мөмкинлек.
 – Туристларны кызыктырырлык милли ризыкларыбыз турында да берничә сүз.
 – Районыбыз татар милли ризыкларына бик бай. Бәлеш, өчпочмак, гөбәдия, токмачлы аш, кыстыбый һ.б. ризыкларны һәр кафеда, ресторанда татып карарга була. Шулай ук туристлар өчен аш-су буенча осталык дәресләре дә  оештырыла. Анда милли ризыкларны әзерләргә өйрәнәләр.
– Бездә кунакханәләр, ял итү урыннары җитәрлекме?
– Арча районында төрле категориядәге кунакханәләр, ял итү урыннары бар. Кунакханәләр шәһәр үзәгендә һәм авылларда да кунакларны кабул итәргә әзер. Ял итү урыннары табигать кочагында урнашкан. Анда уңайлы шартлар тудырылган. Туристлар өчен төрле сувенирлар, милли киемнәр сатып алу мөмкинлеге дә бар.  
– Районның туристлар картасы белән кайда танышырга була?
– Арча районының туристлар картасы белән район Советының рәсми сайтында, туристик мәгълүмат үзәкләрендә һәм кунакханәләрдә танышып була. Картада “Тукай юлы“ маршруты, районның истәлекле урыннары, кунакханәләр, кафелар, рестораннар, транспорт челтәре күрсәтелгән. Арча районының “Тукай юлы“ маршруты – ул тарихны, мәдәниятне һәм табигатьне яратучылар өчен менә дигән мөмкинлек. Рәхим итегез, Арча төбәгенә!
– Арча районына килү өчен транспорт мөмкинлекләре нинди?
– Безгә Казаннан автобус, поезд белән килергә мөмкин. Шулай ук, шәхси автомобиль белән дә килү уңайлы. Район эчендә автобуслар даими йөреп тора.
 – Туризмны үстерү буенча алга таба нинди планнар бар?
– Яңа туристик маршрутлар ачу, кунакханәләр төзү, инфраструктураны яхшырту, милли бәйрәмнәрне киңрәк яктырту – төп бурычларыбыз булып тора.  Арча районында һәркем үз күңеленә хуш килерлек шөгыль таба алачак. Киләчәктә Арча районы тагын да уңышлы туристик юнәлешкә әвереләчәк. Арча – Татарстанның күпкырлы мәдәни һәм тарихи үзәге. Бу урыннарга килүче һәр кеше татар халкының бай мирасы белән таныша һәм искиткеч табигатьтә ял итә ала. Хөрмәтле туристларыбызны  гүзәл Арчабызда көтеп калабыз!