Арчада районара ачык шахмат турниры узды

Анда Арчадан, Кукмара, Балтач, Биектау районнарыннан, Казаннан, Арча Укучылар сараеннан 45 кеше катнашты.

– Минем өчен дә, башкалар өчен дә бу иң зур бәйрәм. Җиңү бәйрәме, яшәү бәйрәме, – диде районның шахмат федерациясе җитәкчесе Марсель Хәлилов. – Әтием сугышның беренче көненнән үк фронтка киткән. Аңа ул чакта нибары егерме яшь булган. Берлинга барып җиткән. Аннан Япониягә каршы сугышка җибәргәннәр. Җиде елдан соң гына исән-сау өйгә кайткан. Менә шундый батыр әтиләребез, бабайларыбыз хөрмәтенә Җиңү көне уңаеннан шахмат ярышлары оештыруны традициягә кертеп җибәрдек.

Турнирны яшьләр эшләре, спорт һәм туризм бүлеге җитәкчесе Әмир Вагыйзов ачып җибәрде. Бөек Ватан сугышында һәлак булганнарны бер минутлык тынлык белән искә алдылар. Әнә шундый героик рухта башланып китте ул. Уеннар да бик киеренке барды. Берәүнең дә җиңеләсе килмәде. Әмма беренче урынны Марсель Хәлилов берсенә дә бирмәде. Икенче урында икенче мәктәптән Алмаз Гатин. Урта Курсадан Мөдәррис Лотфуллин өченче.

– Минем өчен уен бик уңышлы барды. 7,5 очко җыйдым. Бу бик зур күрсәткеч инде, – диде ул. – Яхшы ярыш булды бу. Состав та көчле.

Марсель Хәлилов әлеге ярышларның баш хөкемдары да иде (сәркатиб-хөкемдары Нәзир Фәттахов).

– Гомумән, быелгы сезон аның өчен бик яхшы башланып китте. Апрельдә авыл шахматчылары арасында үткәрелгән республика чемпионатында да ул беренче урынны яулады, – диде Әмир Вагыйзов.

Кызлар арасыннан беренче өч урында Балтач шахматчылары. Малайлардан Арчаның алтынчы мәктәбе укучысы Нияз Заһидуллин икенче, беренче мәктәптән Сәлих Вафин өченче урынны алды. Тренерлары Айдар Яхин. Ветераннар арасында Арчадан Данил Рәхимов икенче булды.

Тик барысы да җиңүче булып бетә алмый. Әмма борчылырга урын юк. Кайбер яшь шахматчылар, мәсәлән, Арча бишенче гимназиясенең икенче сыйныф укучысы Камилә Миннебаева һәм Утар Аты мәктәбеннән дүртенче сыйныф укучысы Чулпан Мостафина өчен мондый ярышлар тәҗрибә уртаклашу мөмкинлеге дә.

– Минем медальләрем дә бар инде. Бер алтын, ике көмеш, өч бронза, – диде Камилә. – Әтием Илназ шахматта уйный. Гаилә белән ярыш булганда ул да катнаша. Апам уйный иде. Ул хәзер теләми, ә миңа ошап китте.

– Бу уку елы башында шахматка йөри башладым. Арча укучылар сараена. Айдар Яхин өйрәтә. Түгәрәккә авылдан әтием, аның вакыты булмаганда әнием алып килә. Миңа бик ошый. Минем әтием дә, абый белән энем дә шахмат уйнарга ярата, – диде Чулпан. – Бүгенге ярышта күп балл җыймадым, әмма минем өчен 1-2 балл да бик әйбәт.

Кызларның җиңүләре алда әле. Аларга уңышлар телибез, ә җиңүчеләрне котлыйбыз.