Арчаның күппрофильле лицее «Зур Бөркетләр сәяхәте» проекты җиңүчеләре булды

Лицей коллективы «Бөркет – сәяхәтче» проектының «Зур Бөркетләр сәяхәте» республика этабында җиңү яулады. Әлеге проект Бөтенроссия «Россия Бөркетләре» программасы кысаларында үткәрелә. Бу хакта күппрофильле лицей үз социаль челтәрләрендә хәбәр итә.

“Бу уңыш — укучылар, укытучылар һәм тәрбия эшендә катнашучы барлык педагогларның уртак хезмәте нәтиҗәсе. Җиңүгә ирешүдә директорның тәрбия эшләре буенча киңәшчесе Ләйсән Гәрәпшина, 3«А» сыйныфының сыйныф җитәкчесе Венера Зәйнуллина, шулай ук өлкән сыйныф укучысы Раяна Гарифуллина зур өлеш кертте”, – диелә хәбәрдә.

Җиңүчеләрне бүләкләү тантанасы Уникаль осталык үзәгендә узды. Чара барышында директор киңәшчесенә Рәхмәт хаты тапшырылды, ә 3«А» сыйныфы укучылары истәлекле бүләкләр белән бүләкләнде.

Тантана милли татар ризыгы – өчпочмак пешерү буенча осталык дәресе белән дәвам итте.