Авылдашым Мәхмүт абый

Мәхмүт абый 1926 елда Арча районының Кече Төрнәле  авылында крестьян гаиләсендә туа. 1943 елда унҗиде яшьлек егет үз теләге белән фронтка китә. Хәрби комиссариаттан аларны шунда ук Суслонгерга җибәрәләр, газап, михнәтләр тулы 6 ае шунда өйрәнүләрдә уза.

1944 елның маенда аны Белоруссия фронтына җибәрәләр. Аннан соң Польша, Латвия, Литва…

Җиңүне ветеран Кенигсбергта каршы ала. Сугыш тәмамланганнан соң аны Украинага десант подразделениесенә җибәрәләр, анда тагын 5 ел хезмәт итә. Һәм 1950 елда гына туган авылына кайта. 40 ел колхозда комбайнчы булып эшли һәм 73 яшендә генә комбайн штурвалын идарә итүдән туктый. Батырлык һәм батырлык өчен Ватан сугышы ордены, «Батырлык өчен» медале һәм күп санлы юбилей медальләре белән бүләкләнә.

Ул авылдашы Рәшидә апа белән озак еллар үрнәк гаилә булып яшәделәр, бер ул үстерделәр, ике оныкларына әби-бабай назы бүләк итеп, аларның бәхетенә куанып, терәк булып яшәделәр. Мәхмүт Гайфулла улы 2009 елда вафат булды. 

Мин кечкенә авылыбыздан күп сугыш, тыл ветераннары, Бөек Җиңүнең танылган һәм билгесез геройлары чыгуы белән бик горурланам!

Зәлидә Фәттахова, Кече Төрнәле