Яңа Кенәрдә җиһангирлар очрашты

Яңа Кенәрдә җиһангирлар очрашты. Казаннан тулы бер автобус белән мәктәп укучылары, укытучылар кайтты. Арчадан Җиһангирлар төркеме җитәкчесе Хәлил Гайнетдинов аларга экскурсовод булды. Байконурда бергә хезмәт иткән хезмәттәшләре дә килде. Очрашуда район хәрби комиссары Азат Вахитов, Байконурда эшләгән подполковниклар Булат Нуриәхмәтов, Александр Белов  катнашты. Очрашу башта Яңа Кенәр мәктәбендә булды. Аннан Җиһангирлар паркына, Яңа Кырлайга бардылар. Җиһангирлар паркында һәйкәлгә чәчәкләр салдылар.

Яңа Кенәрдәге очрашуга кайткан Хәлит Хөсәенов:

“Мин Казаннан, - дип сөйләде. – Бүген өчәү кайттык. Югары белемле егетләр без, институттан соң, 50 кеше Калиниградка хезмәт итәргә китәсе идек. Әмма ул вакытта безне армиягә алган вакытта ил җитәкчесе Леонид Брежнев вафат булды. Самарада безнең маршрутны кинәт кенә үзгәрттеләр - Казахстанга озаттылар. Шулай итеп без Байконур космодромына эләктек. Мин үзем финанс-экономика институтын тәмамладым. Без башта өйрәнүләр үттек, аннан частьларга бүлделәр. Бу космик корабльләр оча торган полигон инде. Анда без Төбәк-Чокырчадан Сергей Рысаев, мин, Арчадан Зөлфәт Фазылҗанов, Әтнәдән Зөлфәт Хәмитов һ.б. хезмәт иттек. Мин ротада старшина идем, Сергей Рысаев үз ротасында старшина,  Зөфәр Фатыйхҗанов минем ротада отделение командиры. Без инде анда югары белемлеләр комнадирлар кебек булдык. Төзелештә эшләдек. Тимер юллар төзедек. Бик зур рәхмәт Хәлил Гайнетдиновка, ул педагогик белемле бик грамоталы кеше, космонавтика темасын гел истә тота, өйрәнә, башкаларга өйрәтә, безне очраштыра. Менә Яңа Кенәрдә Җиһангирлар паркы булдырылды". 

1982 елда бер эшелонга тупланган югары белемле Татарстан егетләрен Байконурга хезмәт итәргә җибәрәләр. Алар Советлар Союзының «Энергия-Буран» исемле иң зур космик проектында катнашалар: «Энергия» ракетасы өчен очып китү урынын әзерлиләр, «Буран» космик корабы  уңышлы төшеп утырсын өчен зур мәйдан төзиләр. 1987 елда «Энергия» ракетасы уңышлы оча, икенче елны ул үз җилкәсендә Җиһанга «Буран»ны алып чыга. 80 тонналы космик  кораб Җир шарын ике тапкыр әйләнеп, Татарстан егетләре әзерләгән мәйданга кире кайта. Байконур егетләре менә кемнәр алар: Хәлил Гайнетдинов, Серггей Рысаев, Павел Тунгусков, Илһам Хисмәтуллин, Халит Хөсәенов, Радик Исхаков, Зөфәр Фазылҗанов, Зөлфәт Хәмитов, Сергей Конопелько һ.б.Ул вакытта солдатлар дөньяда иң беренчесе һәм иң зуры  булган Байконур космодромын төзүдә катнашалар. Еллар үткән саен бу кызыксыну кимеми, киресенчә, арта гына бара. Иң тырышып йөрүче якташыбыз "Җиһангирлар" төркеме җитәкчесе Хәлил Гайнетдинов Ким Шакиров белән  космоска багышланган китап та чыгаралар. Анда Советлар Союзы һәм Россиядәге космик проектларны төзүдә катнашкан татарлар һәм татарстанлылар турында барлык мәгълүматлар да бар. Китапка 700 фамилия кергән, шуларның 400е – татарныкы. Тулырак итеп район газетасында язарбыз.