Татарстанда агросыйныфлар челтәре киңәя

«Агросәнәгать комплексында кадрлар» федераль проекты мәктәп укучысыннан алып тармак предприятиесендә эшләүче белгечкә кадәр өзлексез белем алу системасын булдыруны күздә тота. Әлеге алым мәгариф учреждениеләре белән бизнес арасындагы хезмәттәшлекне ныгытырга мөмкинлек бирә.

Узган ел проектны гамәлгә ашыруга 1 млрд 269 млн сум акча юнәлдерелгән. Бу чаралар кысаларында Казан дәүләт аграр университеты өчен 46 торак урын сатып алынган, уку бинасын реконструкцияләү һәм җиһазлау эшләре алып барылган. Шулай ук җитештерү практикасын узучы 317 студентка хезмәт хакы һәм яшәү чыгымнары капланган, килешү нигезендә һәм максатчан белем алучы 126 студентка ярдәм күрсәтелгән.

2025 елда республиканың 14 районында 20 мәктәптә 42 агротехнология сыйныфы ачылган. Алар генетика һәм селекция, терлекчелек, биотехнологияләр, кошчылык, агроинженерлык һәм чәчәкчелек юнәлешләрен колачлый. Агымдагы ел ахырына кадәр инде 35 мәктәптә 60 агросыйныф ачу планлаштырыла.

Агротехнология сыйныфларында эшләүче физика, химия, математика һәм биология укытучыларына аена 30 мең сум өстәмә түләү каралган. Узган ел бу ярдәмне 80 педагог алган булса, быел 130дан артык укытучыны колачлау көтелә.

Моннан тыш, федераль проект кысаларында Казан дәүләт аграр университетының Механизация һәм техник сервис институты бинасында капиталь ремонт һәм яңарту эшләре дәвам итә.

Татарстан Премьер-министры – авыл хуҗалыгы һәм азык-төлек министры Марат Җәббаров билгеләп үткәнчә, агросыйныфлар булдыру, яшь белгечләргә ярдәм итү һәм кадрларны яңадан әзерләү чаралары бердәм стратегиягә нигезләнгән.

«Безнең төп максат – агросәнәгать комплексын барлык баскычларда да компетентлы, мотивацияле һәм ихтыяҗлы белгечләр белән тәэмин итү», – дип ассызыклады министр.