Театр көллиятендә укучы Алия Абдрәшитова: «Чын урман кисүче хатыннар тормышы белән яшәдек. Агач кистек, чаптык, ташыдык»

Фильм Арча якташлыгы җитәкчелегендә төшерелә. Фильмның продюсеры – К.Тинчурин театры директоры, Арча якташлыгы җәмгыяте җитәкчесе, Татарстанның атказанган мәдәният хезмәткәре Фәнис Мөсәгыйтов. 

Фильмда кастинг аша узып, төрле районнардан җыелган сәләтле кешеләр катнаша. Алар арасында райондашыбыз, Яңа Кенәр кызы Алия Абдрәшитова да бар. Алиянең театр дөньясына омтылуы, сәхнәдән башка яши алмавы турында язып чыккан идек. Ул вакытта кыз 11нче сыйныфта белем ала иде. Бүген Алия Абдрәшитова -  Казан театр көллиятенең 1нче курс студенты. 

Кечкенәдән булган хыялын тормышка ашыруга таба ныклы адымнар белән бара ул. Тиздән райондашыбызны телевизор экраннары аша күрәчәкбез. Фильмны төшерүдән алган хис-кичерешләре турында Алиянең безнең белән дә уртаклашты: 

- Тинчурин театрының социаль челтәреннән  Нурихан Фәттахның «Кырык дүртнең май аенда» әсәре буенча төшереләчәк фильм турында белдем. Фильмның режиссеры Александр Далматов. Фильмда төшү процессын мин "Җылак" фильмында төшкәндә бик ошаттым һәм ул эш ничек башкарылганын беләм, аңлыйм. Озак уйлап тормыйча группадаш кызым белән гариза бирдек. 2-3 көннән кастингка килдек.  Безгә текст укытып караттылар, үзебез турында сөйләдек.1 айдан безгә "сезне фильмга алдык" дип шалтраттылар. Әлеге фильмда мин массовкада урман кисүче кыз булып уйныйм. Кышкы сеъмкалар  Балтач ягындагы урманда, Семрукта үтте. 3 көн урманда чын урман кисүче хатыннар тормышы белән яшәдек: агач кистек, аны чаптык, ташыдык. Без шул 3 көнне дә арып кайттык, ә бит элек гомер буе шундый тормыш белән яшәгән хатыннар булган.
Күп артистлар белән таныштым, танышу гына түгел, алар белән бер площадкада эшләп, бергә фильмда төштем.Әле кайчан гына аларны телевизор, театрларда гына күреп белә идем, алар белән бергә эшләү - чынга ашмаслык хыял гына иде минем өчен. Бу мөмкинлек өчен фильмга өлешен керткән һәр кешегә рәхмәтлемен, - диде булачак артист.