Татарстан Дәүләт Советына Ватанны саклап һәлак булганнар истәлеген мәңгеләштерү турында закон проекты тәкъдим ителде. Хәзерге вакытта документ парламентта беренчел карау этабын үтә.

Закон проекты һәлак булган хәрбиләрнең һәм аларның батырлыкларының истәлеген саклау, тарихи хәтерне ныгыту максатын күздә тота. Документта Татарстан дәүләт хакимияте органнары һәм җирле үзидарәләрнең әлеге юнәлештәге вәкаләтләре дә билгеләнә.

Яңа тәртип махсус хәрби операция барышында бурыч үтәгәндә һәлак булганнарга, шулай ук яралар, контузияләр һәм авырулар нәтиҗәсендә вафат булган кешеләргә дә кагылачак.

Аерым бүлектә Татарстан Хәтер китабын алып бару һәм саклау тәртибен раслау мәсьәләсе урын алган. Бу эшне системалы рәвештә оештыру күздә тотыла.

Аңлатма язуында болай диелә: «Закон проекты Ватанны саклап һәлак булганнар истәлеген һәм аларның батырлыкларын саклау, яшьләрдә ил тарихына хөрмәт тәрбияләү максатыннан эшләнде».

Документта яшь буын белән патриотик һәм тарихи-агарту эшенә дә зур игътибар бирелә. Ул яшьләрдә халкыбыз тарихына хөрмәт, ил һәм республика белән горурлану хисләре тәрбияләүгә, буыннар арасындагы тарихи дәвамчанлыкны саклауга юнәлдерелгән.

Закон проекты буенча фикер алышулар Татарстан Дәүләт Советында дәвам итәчәк.