Алты яшьлек Камил тәкә алды

Сабантуеның төп ярышы булган көрәштә Яңа Кенәр, Сөрде, Арча, Мари Иле һәм Казан көрәшчеләре бил алышты. Башка еллардан аермалы буларак, быелгы Сабантуенда иң яшь көрәшче дә тәкә алды. Аны бүгенге көндә махсус хәрби операция барган зонада хезмәт итүче Яңа Кенәр егете Марат Мөхәммәтшин исеменнән тапшырдылар.

– Бәйрәмгә берничә көн кала шалтыратып, ирем үзе исеменнән тәкә алуымны сорады. “Авылыбыз Сабантуена үз өлешемне кертәсем килә. Ул тәкәне иң яшь көрәшчегә тапшырсыннар“, – диде. Җиңүчегә түгел, нәкъ менә иң яшь көрәшчегә бирергә дип кат-кат әйтте. Әти-әни белән танышлардан тәкә алып кайттык һәм бәйрәм көнне иртә белән оештыручыларга илтеп тапшырдык, – диде Маратның хатыны Гүзәлия ханым.

Әманәт бүләк Яңа Кенәр Сабантуеның иң яшь көрәшчесе алты яшьлек Камил Сафинга насыйп булды.

Ул Яңа Кенәр хастаханәсендә озак еллар хирург булып эшләгән Дамир Сафинның (мәрхүм инде) оныгы булып чыкты. Камил Казанда көрәш түгәрәгенә йөри икән. 

– Безнең өчен көтелмәгән бүләк булды, – дип рәхмәтләрен әйтте Камилнең әти-әнисе.

Авыл җирлеге башлыгы Әгъзәм Гайфуллин Марат Мөхәммәтшинның әти-әнисенә, хатынына рәхмәт әйтте, хәрби хезмәттәге авылдашыбызга сәламнәр җиткерүне сорады.

Марат Мөхәммәтшин 2022 елның октябрь аеннан махсус хәрби операция барган зонада. Ике тапкыр ялга кайтып килгән. Әти-әнисе, хатыны белән булдыра алганча элемтәдә тора.