Арча районында агитбригадачылар игенчеләргә җырларын бүләк итте

“Икмәк булса — җыр да була”, — дип әйтергә ярата агитбригада җитәкчесе Расих Галимҗанов. Чыннан да, көннәр матур торып, урып-җыю да тулы куәтенә барып, ындыр табакларына ашлык кайта башласа, үзеннән-үзе күңел үсеп, нидер көйлисе килә башлый.

Бүген агитбригадачылар: Расих Галимҗанов, Данис Гайфуллин һәм Адилә Нотфуллина “Кырлай” агрофирмасының Иске Иябаш бригадасы ындыр табагында булып, биредә эшләүчеләргә дәртле җырларын бүләк итеп кайтты.

Тамашачылар арасында яшь игенче Рафил Гомәров та бар иде. Рафилнең әле армиядән кайтканына бер ай да юк икән. Башта Киров өлкәсендә, аннан Ростовта хезмәт итеп кайткан егет армиягә киткәнче комбайнда эшләгән. Бүген дә комбайн штурвалын иярли ул. Һәм киләчәген авыл белән бәйләргә тели. Чөнки әти-әниләре дә шушы җирдә эшләп үскән кешеләр, үзләренең үрнәгендә балаларына да җиргә, хезмәткә мәхәббәт тәрбияләгәннәр. Үз җирләре бар, крестьян-фермер хуҗалыгы буларак шунда хезмәт куялар. “Агитбригадачылар элек тә ел саен килә иде. Бүген дә җырларын тыңларга мөмкинлек туды”, - ди Рафил.

Ярты сәгатькә генә якын концерт булса да, хезмәт кешесенә көч бирүче ял ул. Ындыр табагында эшләүчеләр, ашлык ташучылар рәхмәтләре белән озатып калды агитбригадачыларны.

Кайтканда Сикертән кызы Адилә Нотфуллина әйтеп куйды:” Үзебезнең ындыр табагында эшләгән вакытларны сагынып куйдым. И рәхәт вакытлар! Эшләгәнгә бирелгән акчага мәктәпкә киемнәр ала торган идек. Агитбригада килгәнен дә хәтерлим, ашлык өстенә тезелешеп утырып караган идек чыгышларын”.

“Агитбригада 20 ел авыл хуҗалыгында эшләүчеләргә җырларын бүләк итеп йөри инде”, —ди Расих Галимҗанов. Киләчәктә дә шулай шатлык өләшеп яшәргә язсын үзләренә. Ә быел әле аларның чыгышын күрү шактый игенчеләргә насыйп булыр. Әле урып-җыю башланды гына бит...