Арчада шахмат уенына оста гаиләләр көч сынашты

Шахмат турнирында районыбызның 20 гаиләсе катнашты. Арчада яшәүче гаиләләрдән тыш, Казанбаш, Мәтәскә һәм Утар Аты авылларыннан да командалар килгән иде.

Оста шахмат уйнаучы әти-әниләр, әби-бабай һәм балалар җыелып, матур уеннар күрсәттеләр. Уеннарны күзәтүче һәм аларга бәя бирүче Укучылар сараенда шашка-шахмат түгәрәген алып баручы Айдар Яхин иде. 

Ике сәгать дәвамында барган уеннар түбәндәге нәтиҗә белән төгәлләнде: 1 урын - Мостафиннар гаиләсе (Утар Аты), 2 урын - Галәветдиновлар гаиләсе (Арча), 3 урын - Сөләймановлар  гаиләсе (Арча).

Беренче урын алучы Мостафиннар гаиләсе командасы составында гаилә башлыгы, кызы Чулпан һәм улы Рәдиф иде. Балалар икесе дә шахмат белән әле бер генә ел шөгыльләнә. Түгәрәктән тыш, әти кеше алар белән өстәмә дә уйный. Улы Рәдифнең аеруча бу уен төренә оста булуын әйтте гаилә башлыгы. Өйдә калучы биш яшьлек уллары да уйный белә икән. "Миңа җиңәргә түбәтәем булышты", - ди ярышка түбәтәй киеп килүче җиңүче Рәдиф.

Бүләкләү мизгелләрен әлеге сылтама буенча карый аласыз