Балалар полиция бүлегендә

Россия Эчке эшләр министрлыгының Арча районы буенча эчке эшләр бүлеге хезмәткәрләре “Мәктәпкә җыенырга ярдәм ит” акциясенә кушылды.

Алар “Юл хәрәкәте иминлеге” дәүләт бюджет учреждениесе җитәкчесе Энҗе Мөхәммәтҗанова белән берлектә аз керемле һәм имин булмаган гаиләләрдә яшәүче беренче сыйныфка баручы ун балага уку кирәк-яраклары тутырылган букчалар тапшырдылар.  

Гадәттәгечә, балаларны эчке эшләр бүлегенең актлар залына җыйдылар. Полиция начальнигының җәмәгать тәртибен саклау буенча урынбасары полиция подполковнигы Айдар Шакиров балаларны тормышта мөһим этап башлану белән котлады, укуларында уңышлар теләде. Шулай ук ул полиция хезмәткәрләрен шәхси яклау чараларын күрсәтте. Энҗе Мөхәммәтҗанова юл хәрәкәтенең төп кагыйдәләрен исләренә төшерде. Балигъ булмаганнар белән эшләү бүлеге өлкән инспекторы Алсу Һидиятуллина музейны күрсәтте һәм Арча милициясе тарихы белән таныштырды. Тоткарланучыларны вакытлыча тоту изоляторы начальнигы урынбасары полиция лейтенанты Артем Тынчеров үз подразделениесенең эше турында сөйләде һәм автомашинасын күрсәтте.