Чират торабызмы? Торабыз...

Балаларның бассейнда шөгыльләнү өчен медицина тикшерүе үтәсе бар. 27 августта киттек тәвәкәлләп.

Дөрестән дә, балалар консультациясендә кеше күп иде. "Соскоб"ка (бабасырга анализ) язу алып,  "соскоб" алу бүлмәсе янына килсәк - анда кеше! Хәтта чират алу өчен ахыргы кешене дә белеп булмады. Әмма чират тиз үтте. Рәхмәт анализ алучы шәфкать туташына - күпме баланы кабул итеп бетерергә кирәк!

Икенче көнне, ягьни бүген тагын балалар консультациясенә киттек. Бу юлы әзер анализ белән табибка кереп, бассейнга рөхсәт кәгазе алу иде исәп.

Һәрвакыттагыча биредә кеше күп. Үзебезнең участок табибы юк булып чыкты. Икенче табибка талон яздылар. Ишек төбендә "әлегә табиб юк", диделәр. Аптырап, икенче табибка чират алдык. Һәр ишек янында чират. Балалар табибы Светлана Хәбировнага керү бәхетенә ирештек. Талонсыз да кабул итте. Рәхмәт, бик ачык кабул итте. Бассейнга юллама алып, сөенеп өйгә кайтып киттек.