Яшерен-батырын түгел, хатын-кызга Күңел йомшак булды гомергә

Әнгам Атнабаев -Башкортстанның халык шагыйре

Яшерен-батырын түгел, хатын-кызга
Күңел йомшак булды гомергә,
Шуның аркасында туры килде
"Беспартийный" булып йөрергә.

"Ул йөри” дип, затлы исемнәрдән,
Орденнардан мәхрүм иттеләр,
"Йөрмәүчеләр” йөргән олы юлдан
Ипләп кенә читкә типтеләр.

Күрмәсәм дә, сизеп, тоеп тордым
Хатынның да кара карашын.
Унга китәр чакта, сулга киттем,
Гадәтләнгәч - кая барасың?!

Барасың да, кайтмый каласың да,
Тәүбә итәсең дә...
Вәссәлам!
"Вәссәлам” дә,
Ләкин бер атнадан
Кабатлана шул ук мәсьәлә.

Яшерен-батырын түгел, хатын-кыз, дип,
Чәчләр, тешләр бетте кырылып...
Ләкин һаман, матур кызлар үтсә,
Каһәр генә суксын!
Карап калам артка борылып.
Әнгам Атнабаев

3 июнь, 1996