Илгиз, Айдар, Раяттан рәхмәт сүзләре

Бүген редакциягә ике ханым керде. Арча стациясеннән Гүзәл белән Фирдәвес дип таныштырдылар алар үзләре белән. Махсус хәрби операция барган җирдән кыска гына ялга кайткан Илгиз белән Айдарның әниләре булып чыктылар. "Раятның әтисе дә, әнисе дә юк. Без аның өчен дә",  диделәр. Улларыннан рәхмәт сүзе белән хат алып килгәннәр.

Рәхмәт сүзе

Хөрмәтле райондашларыбыз, районыбыз башлыгы Илшат Нуриев, шәһәр башкарма комитеты җитәкчесе Рөстәм Касыймов! Сез безнең үтенечебезне берсүзсез канәгатьләндердегез. Безгә, мобилизацияләнгән егетләргә яу кырында яраланган сугышчыларны тиешле урыннарга чыгару өчен машина белән ярдәм иттегез.

Безгә зур булышлык күрсәткән, машинаны төзекләндерү өчен бөтен кирәк булган запас частьларны бушка биргән шәһәрдәге автосервислар, махсус автозапчастьлар кибетләре хуҗаларына, юлга бензин белән тәэмин иткән “Водоканал-Сервис”, “Жилкомбытсервис”, идарәче компания һәм башка оешмалар җитәкчеләренә олы рәхмәтебезне белдерәбез.

Шулай ук ярдәм күрсәткән бөтен җитәкчеләргә, туганнарга, дусларга, күршеләргә, гомумән, бөтен район халкына чиксез рәхмәтлебез.

Ә без үз чиратыбызда илебез алдындагы бурычыбызны намус белән үтәрбез дип ышандырабыз. Сезнең безгә күрсәткән изгелекләрегез үзегезгә меңе белән әйләнеп кайтсын. Исән-сау булып, җиңүләр яулап, очрашулар насыйп булсын, дип без кабат авыр юлга кузгалабыз.

Илгиз, Айдар, Раят