Сабантуйлар тыныч узсын

Утырышта милли бәйрәмебез Сабантуйларны үткәргәндә , шулай ук мәктәп яны лагерьлары һәм бердәм дәүләт имтиханнары вакытында иминлекне тәэмин итү мәсьәләләре каралды.

Яңа Кенәр авыл җирлеге башлыгы Әгъзам Гайфуллин җирлектә терроризм һәм экстремизмны кисәтү буенча башкарылган эшләргә хисап тотты. Үз чыгышында ул барлык җирлек башлыкларын да борчыган проблеманы күтәрде. Хәзер авылларда йортларны теләсә кем сатып ала. Аларны җирле үзидарә органнары белми дә кала. Соңыннан читтәге яңа хуҗалар кечкенә генә бу авыл йортларына дистәләгән мигрантларны пропискага кертә. Мондый хәл киләчәктә киеренкелек тудырмас дип берәү дә әйтә алмый.

Район башлыгы хокук саклау органнарына кичекмәстән бу мәсьәләне контрольгә алырга кушты.

Соңыннан комиссия сәркатибе, район башлыгы ярдәмчесе Гөлшат Әхмәдуллина комиссиянең агымдагы елның беренче яртыеллыгындагы эш нәтиҗәләре һәм алда торган бурычлар белән таныштырды.