Ике балалы гаилә ис газы белән агуланган

(Казан, 2 гыйнвар, «Татар-информ»). Казанның Авангард урамында торак йортларның берсендә фатирда ике балалы гаилә ис газы белән агуланган. Бу турыдагы хәбәр ашыгыч хезмәтнең 112 номерына килгән.

«Татар-информ» агентлыгына Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр итүләренчә, 30 яшьлек ир белән хатын, шулай ук аларның 7 һәм 4 яшьлек ике кызлары ис газы белән агуланган.

Кызлар Балалар республика клиник хастаханәсенә, ә олылар шәһәрнең 7нче хастаханәсенә китерелгән. Аларның хәле уртача авыр дип бәяләнә.

Бу хәл килеп чыгу сәбәпләрен ачыклыйлар. 
Тулырак: https://tatar-inform.tatar/news/incident/02-01-2022/kazanda-fatirda-ike-balaly-gail-is-gazy-bel-n-agulangan-5846454