Газ хезмәткәрләрен өйгә кертмәгән өчен Татарстанда 1,1 миллион сумнан артык штраф салынган

Татарстан Дәүләт торак инспекциясе мәгълүматларына караганда, республикада газ хезмәткәрләрен фатирларга кертмәү очраклары буенча 647 административ эш каралган. Шуларның 185е буенча штраф билгеләнгән. Тагын 102 материал әлеге вакытта тикшерү стадиясендә кала.

Ведомствода билгеләп үтүләренчә, газ җиһазларының төзеклеген вакытында тикшерү иминлекне тәэмин итү өчен кирәк. «Газ җиһазларына даими хезмәт күрсәтү һәм белгечләрне вакытында кертү куркынычсызлык таләпләрен үтәүнең мөһим өлеше булып тора», — дип хәбәр итәләр Дәүләт торак инспекциясендә.

Моннан тыш, республика халкына газ җиһазларын техник хезмәт күрсәтү турында килешү төзүдән баш тарткан өчен, шулай ук биналарны рөхсәтсез үзгәртү һәм җиһазларны үз белдеге белән алыштыру очраклары буенча да административ җаваплылык чаралары күрелгән.

Әлеге хокук бозулар өчен гомуми күләме 425 мең сум тәшкил иткән штрафлар салынган.

Белгечләр газ җиһазларын вакытында тикшертергә, хезмәт күрсәтү килешүләрен рәсмиләштерергә һәм тикшерү үткәрүче хезмәткәрләргә керү мөмкинлеге тудырырга чакыра. Бу йортларда һәм фатирларда куркынычсызлыкны тәэмин итү өчен мөһим шарт булып санала.

Чыганак: Татар-информ