Татарстанның Биектау районында дүрт төбәктән килгән 70 вәкил катнашында «Өйрәнеп хезмәт итү» программасын үстерүгә багышланган төбәкара семинар узды. Очрашуда яшьләрне җәмгыятькә файдалы эшләргә җәлеп итү һәм социаль проектларны мәгариф системасына кертү мәсьәләләре каралды.
Семинарда коммерцияле булмаган оешмалар, югары уку йортлары һәм бизнес-берләшмәләр вәкилләре катнашты. Экспертлар уңышлы социаль проектлар тәҗрибәсе белән уртаклашты, студентларның белем алу барышында ук җәмгыять өчен мөһим бурычларны хәл итүдә катнашу мөмкинлекләрен тәкъдим итте.
Программаның төп максаты – белемне гамәлдә куллану
«Өйрәнеп хезмәт итү» программасы уку процессын җәмгыятьнең актуаль ихтыяҗлары белән бәйләргә, студентларны игелекле һәм файдалы эшләргә җәлеп итәргә ярдәм итә.
«Программа белем бирү процессын җәмгыятьнең актуаль мәсьәләләрен хәл итү белән берләштерергә мөмкинлек бирә. Алынган белемнәр һәм яңа идеяләр Татарстанда һәм башка төбәкләрдә иреклелек хәрәкәтен үстерүгә нигез булыр дип ышанам», – дип билгеләп үтте Татарстан Республикасының Волонтерлыкны үстерү буенча мәгълүмати-ресурс үзәге башкарма директоры Айрат Мөбәрәкшин.
Очрашу нәтиҗәләре буенча оешмалар үзара хезмәттәшлек итәргә килеште һәм яшьләрне социаль әһәмияткә ия проектларга җәлеп итү буенча алдагы эш юнәлешләрен билгеләде.
Семинарны Татарстан Республикасының Волонтерлыкны үстерү буенча мәгълүмати-ресурс үзәге Яшьләр эшләре министрлыгы һәм Добро.рф ассоциациясе ярдәме белән оештырды.
Иреклелек хәрәкәтен үстерү һәм социаль җаваплы яшь буын тәрбияләү – Россия Президенты Владимир Путин инициативасы белән гамәлгә ашырыла торган «Яшьләр һәм балалар» илкүләм проектының мөһим юнәлешләреннән берсе.
Нет комментариев